ՌԴ-ում ՀՀ դեսպանը եւ Յարոսլավլի նահանգապետը քննարկել են մարզից Երեւան թռիչքներ իրականացնելու հնարավորությունը
Նահանգապետ Միխայիլ Եվրաեւը, քաղաքապետ Արտյոմ Մոլչանովը եւ ՌԴ-ում ՀՀ արտակարգ եւ լիազոր դեսպան Վաղարշակ Հարությունյանը քննարկել են ՌԴ Յարոսլավլի մարզի եւ ՀՀ Արմավիրի մարզի միջեւ համագործակցության հեռանկարները։ Հանդիպումը կայացել է մարզում մեկնարկած Հայաստանի օրերի շրջանակներում։
«Տարածաշրջանը Հայաստանի հետ համագործակցության երկար ավանդույթ ունի։ 2008 թվականին Յարոսլավլի մարզի կառավարության եւ Արմավիրի մարզի վարչակազմի միջեւ ստորագրվել է առեւտրատնտեսական, գիտատեխնիկական եւ մշակութային համագործակցության մասին համաձայնագիր։ Այս պահին մշակվում են հայկական շուկայում Յարոսլավլի «Ատրուս», «Արոնապ», «Պորեչսկի» պահածոների գործարան»-ի, ինչպես նաեւ Յարոսլավլի խմիչքների գործարանի, «Սոբրանիե» հրուշակեղենի գործարանի մասնաբաժնի ընդլայնման հարցերը»,- ասել է Եվրաեւը։
Յարոսլավլի մարզի նահանգապետը հիշեցրել է, որ տարածաշրջանում լայնածավալ ճարտարապետական լուսավորության ծրագիր է սկսվել։ Նա դեսպանին ասել է, որ 2023 թվականի ամռանը կսկսի գործել Սուրբ Գեւորգ եկեղեցու լուսավորությունը, որը գտնվում է Յարոսլավլում՝ հայկական մշակութային կենտրոնի հարեւանությամբ։
Կրթության ոլորտում արդեն իրականացվել են մի շարք համատեղ ծրագրեր, կազմակերպվել է սպորտային, երիտասարդական պատվիրակությունների փոխանակում, բիզնես առաքելություններ, կապեր են հաստատվել մարզերի առեւտրաարդյունաբերական պալատների միջեւ։
Վաղարշակ Հարությունյանն իր հերթին նշել է, որ Հայաստանի օրերը նախագիծ է, որը նախատեսվում էր անցկացնել Ռուսաստանի Դաշնության շատ մարզերում։
«Մենք պարտավոր ենք եւ՛ Ռուսաստանի, եւ՛ Հայաստանի համար այս դժվարին ժամանակաշրջանում ցույց տալ, թե ով է դաշնակիցը։ Ուստի մշակութային կապերը շատ կարեւոր են։ Եվ կարեւոր է, որ դրա համար մենք ոչինչ ստեղծելու կարիք չունենք։ Մեր խնդիրն է սերունդներին փոխանցել այն, ինչը մեզ միավորում է։ Մենք ունենք հարուստ պատմություն, եւ դրա վկայություններից մեկը Հայրենական մեծ պատերազմում մեր համատեղ հաղթանակն է։ «Հայաստանի օրեր» նախագծի միջոցով մենք կլուծենք այս խնդիրը։ Եվ, իհարկե, մենք կշարունակենք առեւտրատնտեսական, գիտատեխնիկական եւ մշակութային համագործակցությունը»,- ասել է Հայաստանի դեսպանը։
Նախատեսվում է ագրոարդյունաբերական համալիրի եւ սպառողական շուկայի ոլորտներում փոխգործակցության հետագա զարգացում, միջքաղաքային նոր կապերի հաստատում։
Հանդիպման ընթացքում քննարկվել են նաեւ տրանսպորտի ոլորտում գործընկերության հարցեր, մասնավորապես՝ «Տունոշնա» օդանավակայանից Երեւան թռիչքներ իրականացնելու հնարավորությունը։
Կրթության եւ գիտության ոլորտում համագործակցության զարգացման շրջանակներում Խ․ Աբովյանի անվան հայկական պետական մանկավարժական համալսարանը եւ Յարոսլավլի Կ. Դ. Ուշինսկու անվան պետական մանկավարժական համալսարանը համագործակցության հուշագիր են ստորագրել։
Իրականացվում է Յարոսլավլի մարզի եւ Հայաստանի մարզական թիմերի փոխանակում այնպիսի մարզաձեւերում, ինչպիսիք են լողը եւ սպորտային մարմնամարզությունը։
Աղբյուրը՝ news.am