440 միլիոն դրամ Սյունիքում 40 կրթահամալիր ստեղծելու համար. Կառավարության որոշումը
Կառավարությունն ավելի քան 440 միլիոն դրամ հատկացրեց Սյունիքի մարզում 40 կրթահամալիրի կառուցման նախագծանախահաշվային աշխատանքները սկսելու համար։ Կառավարության նիստի ժամանակ համապատասխան նախագիծը ներկայացրեց Կրթության, գիտության, մշակույթի և սպորտի նախարար Ժաննա Անդրեասյանը։
«Դեռևս նախորդ տարի վարչապետի որոշմամբ հաստատվել է Սյունիքի մարզում կրթական որակյալ ծառայությունների ապահովման ծրագիրը, որի շրջանակներում նախատեսվում է Սյունիքի գյուղական բնակավայրերում ստեղծել կրթահամալիրներ, որտեղ երեխաների և մեծահասակների համար կիրականացվեն թե՛ դպրոցական, թե՛ նախադպրոցական, թե՛ ոչ ֆորմալ կրթության ծրագրեր։ Կրթահամալիրները հագեցված կլինեն անհրաժեշտ լաբորատորիաներով, տեխնոլոգիաներով, այլ գույքով, կունենան մարզադահլիճ և հանդիսությունների սրահ, որոնք կծառայեն նաև իբրև բնակավայրի մշակութային և սպորտային միջավայր՝ կրթահամալիրը դրանով իսկ վերածելով համայնքային կենտրոնի»,- ասաց Անդրեասյանը։
Նախարարի խոսքով՝ առանձնացվել են 40 գյուղական բնակավայրեր, որտեղ կգործեն կրթահամալիրները։ Դրանք կծառայեն նաև իբրև կրթական կենտրոններ՝ շրջակա բնակավայրերի նախադպրոցական և դպրոցական տարիքի երեխաների համար, որոնք կրթահամալիր կտեղափոխվեն հատուկ նպատակով գնված և օգտագործվող տրանսպորտային միջոցներով՝ ուղեկցորդի ուղեկցությամբ։ Աշխատանքների ընթացքում կազմվել են նաև շրջակա բնակավայրերից կրթական համալիրներ տանող երթուղիները։
«40 կրթահամալիր ստեղծելու նպատակով նախատեսվում է հատկացնել ավելի քան 440 միլիոն դրամ»,- նշեց Անդրեասյանը։
Աղբյուր՝ armenpress.am