Ցանկություն կա, ժամկետներ՝ ոչ․ ե՞րբ կտրամադրվեն բիոմետրիկ անձնագրերն ու էլեկտրոնային կրիչով նույնականացման քարտերը
Առանց կրիչի նույնականացման քարտեր՝ բոլոր ցանկացողներին․ փետրվարի 15–ից Հայաստանում սկսվել է նույնականացման քարտերի տրամադրումը։ Ներքին գործերի նախարարության միգրացիայի ու քաղաքացիության ծառայության պետ Արմեն Ղազարյանը ejc.am -ի թղթակցի հետ զրույցում բացատրում է՝ նույնականացման քարտերն առանց էլեկտրոնային կրիչի են, քանի որ նախկին համակարգը հնացել է, մաշվել, և արդեն տրամադրված նույնականացման քարտերի էլեկտրոնային կրիչներն այժմ չեն արտադրվում։ Այդ իսկ պատճառով, մինչև համակարգի ամբողջական արդիականացումը, նույնականացման քարտերն առանց կրիչների կլինեն։ Էլեկտրոնային կրիչն իր մեջ պարունակում էր ամբողջական բիոմետրիկ տվյալները, նաև՝ նույնականացման քարտերի վրա ֆիքսվող տեղեկությունները։ Այժմ «Էկենգ» ընկերությունն ու մյուս գերատեսչությունները, որոնք աշխատում են էլեկտրոնային ստորագրությամբ, խնդիրը լուծել են։ Առանց էլեկտրոնային կրիչի նույնականացման քարտ ստացող քաղաքացին, ըստ անհրաժեշտության, կարող է մոտենալ իր հեռախոսը սպասարկող բջջային ընկերությանը, փոխել հեռախոսի քարտը, և հեռախոսի միջոցով՝ mobile id–ի կիրառմամբ, օգտագործել իր էլեկտրոնային ստորագրությունը։
Նույնականացման նոր քարտեր կլինեն, թե երբ՝ պարզ չէ
Միգրացիայի ու քաղաքացիության ծառայության պետ Արմեն Ղազարյանի խոսքով՝ նոր նույնականացման քարտեր ունենալու գործընթացն ավելի երկարատև է։ Դա պայմանավորված է ընդհանուր թվայնացման օրակարգով։ ՀՀ–ում կենսաչափական տվյալներ պարունակող փաստաթղթերի տրամադրման նոր համակարգ ներդնելու համար տեղեկատվական տեխնոլոգիաների համակարգի կառավարման խորհուրդ է ստեղծվել, որը գլխավորում է փոխվարչապետ Մհեր Գրիգորյանը։ Այդ համակարգի շրջանակներում ամբողջական թվային հասարակություն ստեղծելուն, ծառայություններն ընդլայնելուն ուղղված ծրագրեր են մշակվում։ Գործող նույնականացման քարտերը գործում են մինչև վավերականության ժամկետի ավարտը։ Դրանք տրամադրվում են տասը տարով։ Ժամկետի ավարտից հետո քաղաքացիները դիմում են անձնագրային ծառայություն։ Այստեղ գործում է «մեկ պատուհան» սկզբունքը։
Հստակ չէ ՝ երբ կլինեն նոր կենսաչափական անձնագրերը
Այս պահին ՀՀ–ում տրամադրվում են կապույտ, առանց բիոմետրիկ կրիչի անձնագրեր։ Դրանք կտրամադրվեն մինչև նոր կենսաչափական անձնագրերի կիրառումը, իրենց մեջ կրելով ամբողջական ինֆորմացիան։ Ծրագիրը մշակման փուլում է, այդ ուղղությամբ աշխատանքներ տարվում են։ Ղազարյանը ժամկետներ չի նշում, բայց հույս ունի, որ առաջիկա տարիներին կլուծվի հարցը։ Նրա պարզաբանմամբ՝ նոր կենսաչափական անձնագրերում կարևորը ոչ թե ավելի շատ կամ քիչ տվյալներ ներառելն է, այլ եղածը պահպանելն ու դրանց փոխգործելիությունն ապահովելը։
Ներկայիս կենսաչափական անձնագրերի կրիչների արտադրության հետ կապված խնդիրներ կան, քանի որ աշխարհում արդեն չկա նման բիոմետրիկ կրիչներ արտադրող կազմակերպություն։ Կենսաչափական անձնագրեր և նույնականացման քարտեր արտադրող լեհական «PWPW S.A.» ընկերության հետ կնքված պայմանագրի ժամկետը լրացել է ու այն չի թարմացվել։ Արմեն Ղազարյանը վստահեցնում է, որ լեհական ընկերությունը չի հրաժարվել Հայաստանի կառավարության հետ համագործակցելուց։