Ուկրաինան կարգելի Մոլդովայից ցանկացած ապրանքի ներմուծումը, եթե վերջինս սահմանափակի ուկրաինական հացահատիկի ներկրումը
Ուկրաինայի իշխանությունները պատրաստ են արգելել ցանկացած ապրանքի ներմուծումը Մոլդովայից, եթե Մոլդովայի կառավարությունը սահմանափակի հացահատիկի ներկրումն Ուկրաինայից։ Այս մասին հայտնել է Ուկրաինայի տնտեսական զարգացման, առևտրի և գյուղատնտեսության փոխնախարար Տարաս Կաչկան։
«Մենք Քիշնևին տեղեկացրել ենք, որ Մոլդովայի կողմից ցանկացած սահմանափակում կդիտարկվի որպես ծայրահեղ անբարյացակամ քայլ և կհանգեցնի Մոլդովայից բոլոր ներմուծումների անհապաղ արգելքին», – ասել է պաշտոնյան:
Գերատեսչության ղեկավարի տեղակալի խոսքով՝ Կիևի կողմից նման արգելքի ներդրումն արդեն համաձայնեցված է և նախապատրաստական փուլում է։
Հիշեցնենք՝ օրերս Մոլդովայի գյուղատնտեսության և սննդի արդյունաբերության նախարար Վլադիմիր Բոլյան հայտարարել է, որ պատրաստվում է սահմանափակել հացահատիկի ներկրումն Ուկրաինայից՝ հետևելով Արևելյան Եվրոպայի մի քանի երկրների օրինակին։