ԵՄ-ի և Թումո կենտրոնի համատեղ ֆինանսավորմամբ Երևանում նոր ինովացիոն լաբորատորիա կստեղծվի
Այսօրվանից մինչև մայիսի 16-ը՝ երեք օր մեր երկրում են հյուրընկալվել աշխարհի ավելի քան 70 երկրի բարձրաստիճան պաշտոնյաներ, ֆինանսական ընկերությունների ղեկավարներ ու ձեռնարկատերեր, միջազգային կազմակերպությունների ներկայացուցիչներ՝ մասնակցելու Վերակառուցման և զարգացման Եվրոպական Բանկի ամենամյա 33-րդ տարեկան հանդիպմանը: Այն այս տարի անցկացվում է Երևանում: Դրա շրջանակներում շուրջ 2000 մասնակիցներ նաև հնարավորություն կունենան մասնակցել «Ազդեցության համատեղ գործադրում» խորագիրը կրող Գործարար համաժողովին:
Հենց այսօր մեկնարկած ՎԶԵԲ-ի տարեկան հանդիպման շրջանակներում, հանդիպում տեղի ունեցավ Թումո ստեղծարար տեխնոլոգիաների կենտրոնում, որտեղ ելույթով հանդես եկան հայազգի գործարար, մի շարք հեղինակավոր ընկերությունների հիմնադիր Նուբար Աֆեյանը, միջազգային ընկերությունների այլ ներկայացուցիչներ ու ղեկավարներ: Նուբար Աֆեյանը բացման խոսքում ոգևորությամբ կարևորեց համաժողովի անցկացումն իր հայրենիքում: Խոսեց իր հետագա հայրենանվեր ծրագրերի մասին: Համաժողովի ընթացքում քննարկվեցին նաև առևտրի, էներգետիկայի և գործարար ոլորտին վերաբերող այլ հարցեր:
Դրան հաջորդեց ԵՄ-ի և Թումո կենտրոնի համատեղ ֆինանսավորմամբ Երևանում նոր ինովացիոն լաբորատորիա ստեղծելու ծրագրի իրականացման քննարկումը: Ծրագրին միացան նաև Վերակառուցման և զարգացման եվրոպական բանկն ու Ինեկոբանկը, որոնց միջև կնքվեց Ֆինանսական փաստաթուղթ՝ իրենց ֆինանսական աջակցությունը բերելով ծրագրի աջակացմանը:
Փաստաթուղթն իրենից ենթադրում է շուրջ 14,5 միլիոն եվրոյի աջակցության ծրագիր, սակայն ծրագրի ամբողջ բյուջեն կազմում է 30 մլն եվրո: Այն կխթանի Երևանում ԵՄ Թումո կենտրոնի զարգացմանը: Մասնավորապես նորարարության և տնտեսական աճի բարձր ցուցանիշ ապահովելու նպատակով Երևանում կկառուցվի այնպիսի ինովացիոն կենտրոն, որը հագեցած կլինի ինժեներական և կիրառական գիտություններին համապատասխան նորագույն սարքավորումներով:
Ծրագիրն իրականացնողների խոսքով՝ շենքը մտադիր են կառուցել 2,5 տարում: Ճարտարապետական նորագույն լուծումներով այս շենքը կունենա հորիզոնական երկնաքերի տեսք: Այն իր մեջ կընդգրկի կոնֆերանսների և միջոցառումների համար նախատեսված սրահներ՝ ինչպես կրթական, այնպես էլ տարաբնույթ ծրագրեր իրականացնելու համար: Կենտրոնը կառուցվելու է ներկայիս Թումո կենտրոնի հարևանությամբ:
Թումո կենտրոնի զարգացման գծով հիմնադիր Բեկոր Փափազյանի խոսքով՝ եթե ներկայիս կենտրոնում հաճախում են միայն մինչև 18 տարեկանների խումբը՝ ապա վերջինս նախատեսված է տվյալ տարիքային շեմից բարձր անձանց համար: Կարևորելով ծրագրի իրականացումը՝ նշեց որ այն միտված է Հայաստանում զարգացնել գիտական և տեխնոլոգիական կյանքը: Հետագայում արդեն այդպիսի Թումո լաբորատորիաներ կստեղծվեն նաև մարզերում: