Երևանում կայացել է Կիպրոս կղզու զբոսաշրջային հնարավորությունների շնորհանդեսը
Մայիսի 14-ին Երևանում տեղի է ունեցել Կիպրոսի զբոսաշրջության նախարարության կողմից կազմակերպված Կիպրոս կղզու զբոսաշրջային հնարավորությունների շնորհանդեսը։
Հայաստան էին ժամանել ԱՊՀ երկրներում Կիպրոսի զբոսաշրջության նախարարության ազգային գրասենյակի ղեկավար, ՌԴ-ում Կիպրոսի Հանրապետության դեսպանատան զբոսաշրջության կցորդ Դիմիտրիս Դիմիտրիուն, ինչպես նաև Կիպրոսի զբոսաշրջության նախարարության արտաքին կապերի բաժնի մարքեթինգի գծով մենեջեր Մարիա Միխայլովան և Կիպրոսի St. Raphael Hotel & Resort և Mediterranean Beach հյուրանոցների ներկայացուցիչները։
Երևանի DWP Congress հյուրանոցում կայացած հանդիպմանը հավաքվել էին Երևանի առաջատար տուրօպերատորների և տուրիստական գործակալությունների ներկայացուցիչներ, լրագրողներ և զբոսաշրջային բլոգերներ։
Իր ողջույնի խոսքում Դիմիտրիս Դիմիտրիուն ասել է. «Մեր զբոսաշրջության ազգային գրասենյակի հիմնական առաքելությունը Կիպրոսի զբոսաշրջության խթանումն է այնպիսի երկրներում, ինչպիսիք են Հայաստանը, Վրաստանը, Ղազախստանը և ԱՊՀ այլ երկրները։
Կիպրոսի զբոսաշրջության նախարարությունը բարձր նպատակներ է դրել զբոսաշրջության նոր շուկաների զարգացման համար։ Ձեզ հետ միասին մեր այսօրվա միջոցառումը Կիպրոսը Հայաստանում գովազդելու ակտիվ գործողությունների շարունակությունն է։
Հատկապես ուրախ ենք, որ այս միջոցառմանը ներկա են զբոսաշրջության ոլորտի մասնագետներ, որոնց հետ կձգտենք զարգացնել մեր համագործակցությունը և սերտացնել մեր փոխշահավետ շփումը։
Համառոտ պատմեմ իմ երկրի հիմնական տուրիստական առավելությունների մասին. Կիպրոսում զբոսաշրջությունը հարմար է հանգստացողների բազմաթիվ կատեգորիաների համար: Կիպրոսը հիմնականում ընտրում են երիտասարդները, ինչպես նաև երիտասարդ զույգերը, միջին տարիքի մարդիկ, գործարարները։ Կիպրոսը մեծ պահանջարկ ունի ընտանեկան զբոսաշրջության համար։ Կիպրոսի զբոսաշրջային արտադրանքը պահանջված է նաև խրախուսական ճամփորդությունների և համաժողովների համար։
Սեզոնային տատանումների հարթեցումը Կիպրոսի զբոսաշրջության ոլորտի բոլոր մասնակիցների հիմնական նպատակներից մեկն է։ Բացի արևից և ծովից, Կիպրոսը բազմաթիվ այլ առավելություններ ունի` դառնալու ամբողջ տարվա զբոսաշրջության վայր: Կիպրոսը պատրաստ է հյուրերին առաջարկել բարձրորակ ծառայություններ զբոսաշրջության շուկայի այնպիսի սեգմենտներում, ինչպիսիք են գաստրո զբոսաշրջությունը, սպորտային, բժշկական, առողջապահական տուրիզմը, հարսանեկան տուրիզմը և զբոսաշրջության բազմաթիվ այլընտրանքային ձևեր, որոնք, ի վերջո, կհարստացնեն զբոսաշրջային արտադրանքը և կգրավեն ավելի շատ զբոսաշրջիկների: Զբոսաշրջության արտադրանքի մեջ առանձնահատուկ տեղ է զբաղեցնում Luxury սեգմենտը։
Կիպրոսի բազմամշակութային ժառանգությունը այլընտրանքային զբոսաշրջության ամենակարևոր ձևն է և շատ կարևոր չափանիշ օտարերկրյա այցելուների կողմից կղզու ընտրության համար: Բայց Հայաստանից ժամանած հյուրերի համար առանձնահատուկ գրավիչ է մեր քրիստոնեական հավատքի ընդհանրությունը»։
Այնուհետև Մարիա Միխայլովան մանրամասն ներկայացրել է Կիպրոս կղզու զբոսաշրջային հնարավորությունները, ինչպես նաև տեղեկացրել մոտ ապագայում Հայաստանում Կիպրոսի Հանրապետության դեսպանության բացման մասին, ինչը մեծապես կհեշտացնի Կիպրոսի վիզա ստանալու գործընթացը, որն էլ, իր հերթին, կնպաստի զբոսաշրջիկների հոսքի ավելացմանը։
Մարիա Միխայլովան ընդգծել է, որ 2024 թվականի ամառային սեզոնին WizzAir և FlyOne ավիաընկերությունները Երևանից Լառնակա կիրականացնեն շաբաթական մինչև 18 չվերթ։
Հայաստանցի հյուրերը սիրում և ճանաչում են Կիպրոսը. Զբոսաշրջիկների 80%-ը կղզի է այցելում երկրորդ անգամ։ Հայերը նախընտրում են ճանապարհորդել հունիս-սեպտեմբեր ամիսներին` ընտանիքներով, հիմնականում 4 հոգով, միջինը 10 օր, 4-5* հյուրանոցներում։
Մարիա Միխայլովայի խոսքով` նախարարության նպատակն է կղզին դիրքավորել որպես ամբողջ տարվա ուղղություն, քանի որ ամբողջ տարվա ընթացքում Հայաստանից Կիպրոս թռիչքներ են իրականացնում:
– Դուք միշտ կարող եք մանրամասն տեղեկություններ ստանալ Կիպրոսի մասին և ներբեռնել աուդիո և վիդեո նյութեր, գտնել տեղեկատվական բրոշյուրներ մեր կայքում` www.visitcyprus.com , – նշել է Մարիա Միխայլովան։
Նշենք, որ մինչև 2023 թվականը զբոսաշրջիկների թիվը Կիպրոս կղզի (խոսքը հենց հայկական շուկայի մասին է, այլ ոչ թե տարանցիկ մեկնող ռուսաստանցիների) կազմել է 5 000-ից ոչ ավել։
2022 թվականին զբոսաշրջիկների հոսքը Հայաստանից Կիպրոս հասել է մինչև 9 000։ 2023 թվականին գրանցվել է 100% աճ։