GIS միասնական էլեկտրոնային համակարգը Երևանի խնդիրների լուծմանն ուղղված աշխատանքները կդարձնի ավելի արդյունավետ
Երևանի քաղաքապետարանի ներդրած նոր GIS էլեկտրոնային քարտեզն էապես արդյունավետ կդարձնի կառույցի աշխատանքներն` ուղղված մայրաքաղաքի խնդիրների լուծմանը։ Այն նաև կպարզեցնի, ավելի հասանելի ու թափանցիկ կդարձնի քաղաքացիներին մատուցվող ծառայությունները։
«Արմենպրես»-ի հետ զրույցում Երևան քաղաքի կառավարման տեխնոլոգիաների կենտրոնի տնօրեն Սարգիս Մանուկյանը նշեց, որ հարթակն առաջնահերթ նախատեսված է քաղաքաշինության և քաղաքային պլանավորման ոլորտի համար։
«Առցանց ռեժիմով հավաքագրվում են մի շարք կառույցներից ստացված տարբեր տվյալներն՝ անգամ օդի աղտոտվածության ցուցիչները: Երևանի միասնական հարթակի ամենակարևոր ձեռքբերումներից է քաղաքի էլեկտրոնային կրկնօրինակը: Անօդաչու թռչող սարքից արված լուսանկարները թույլ են տալիս ստանալ ցանկացած շենքի կամ տարածքի 3D մոդելը, իսկ տիեզերանկարների համադրմամբ՝ տեսնել քաղաքի զարգացումն ու կառուցապատումը տարիների ընթացքում»,-նշեց նա:
Մանուկյանի խոսքով՝ համակարգի մի շարք բաժիններում հավաքագրված տվյալների մեծ մասը նախատեսված է ներքին կիրառման նպատակով: Կան բաժիններ, որ հասանելի են քաղաքացիներին և ըստ նրա, եթե քաղաքապետարանը տեսնի, որ կարիք կա որևէ բաժին հասանելի դարձնելու քաղաքացիներին, հետագայում դա կարվի:
«Տարածատեղեկատվական միասնական GIS համակարգը նախատեսվում է ներդնել նաև քաղաքային տնտեսության մի շարք այլ ոլորտներում, այդ թվում՝ աղբահանության: Հարթակի շնորհիվ հեշտությամբ կարելի է տեսնել, թե քաղաքի որ հատվածում է առկա աղբի կուտակում և ե՞րբ ու ինչպե՞ս է այն վերացվելու:
Նախատեսվում է ունենալ քաղաքային երթևեկության և լուսացույցների առցանց տվյալները, ինչի շնորհիվ հնարավոր է դիտարկել նաև հասարակական տրանսպորտի շարժը և վերահսկել ծառայության որակը:
Բնապահպանության ու հատկապես կանաչապատման ոլորտում GIS-ը կիրառվելու է կանաչ տարածքների քարտեզագրման, պլանավորման, ոռոգման ցանցի կառուցման, մոնիթորինգի և այլ գործառույթներում»,-ասաց Սարգիս Մանուկյանը:
Կենտրոնի տնօրենն ընդգծեց՝ հարթակի հնարավորությունները բավականին լայն են և քաղաքապետարանը շարունակելու է ընդլայնել և թվայնացնել քաղաքային տնտեսության ճյուղերը՝ բարձրացնելով մատուցվող ծառայությունների որակը: