ՀՀ ՏԿԵ նախարարը և Գեղարքունիքի մարզպետն այցելել են «Մասրիկ-1» Հայաստանի ամենախոշոր արևային կայանի շինհրապարակ

Ինչպես տեղում ներկայացրին շինարարական աշխատանքներն իրականացնող «Շտիգեն» ընկերության ներկայացուցիչները, Գեղարքունիքի մարզում կառուցվում է Հայաստանի ամենախոշոր արևային կայանը, որը զբաղեցնում է 130 հեկտար տարածք եւ կունենա 62 մեգավատ հզորություն։

Շինարարությունը սկսվել է 2023 թվականի նոյեմբերից, որտեղ ներգրավվել է ավելի քան 130 աշխատակից, այդ թվում՝ Մեծ Մասրիկ բնակավայրից։

«Մասրիկ-1» արևային կայանը տարեկան արտադրելու է 128.332 գեգավատ ժամ էլեկտրաէներգիա, ինչը կբավարարի ավելի քան 20 000 տնտեսության էներգետիկ կարիքները։

Ի դեպ, այս ցուցանիշը թույլ կտա խուսափել տարեկան ավելի քան 54 000 տոննա ածխաթթու գազի արտանետումից։

Բացի այդ, կայանի կառուցման համար կօգտագործվի 114 984 արևային վահանակ։ Կայանի կառուցումը կատարվում է միջազգային չափորոշիչներին համապատասխան։

Նախարարը և մարզպետը զրուցեցին կայանի սեփականատեր ու կապալառու ընկերությունների և շինարարության պատասխանատու ներկայացուցիչների հետ, ծանոթացան շինարարության ընթացքին։

Շինարարական աշխատանքները նախատեսվում է ավարտի հասցնել այս տարվա հոկտեմբերին։