ՊՎԾ-ն մշտադիտարկում է իրականացնում 20 խոշորագույն պետական ընկերություններում
Այս պահին իրականացնում ենք ուսումնասիրություններ եւ մշտադիտարկումներ շուրջ 50 պետական կառավարման համակարգի մարմիններում, որոնցից 1/3-ը ուսումնասիրություններ են, որոնք իրականացվում են վարչապետի հանձարարությամբ, մնացածը՝ մշտադիտարկումներ:
«Այս պահին իրականացնում ենք մշտադիտարկում 20 խոշորագույն պետական ընկերություններում, որտեղ պետությունն ունի 50 եւ ավելի բաժնեմաս: Մենք այդ ընկերություններում նախորդ տարվա ֆինանսական փաստաթղթերում ուղղումներ ենք նկատել եւ ծախսագրումների նվազեցման, եկամուտների աճի ֆոնին խնդիր է առաջացել: Պետության շահաբաժինների 50 տոկոսը, որ պետք է փոխանցվի պետական բյուջե, այդտեղ անճշտություններ ենք հայտնաբերել, որոնց ընդհանուր գումարը մոտ 800 մլն դրամ է: Մոտ 427 մլն ծախսերի նվազեցումներ էին արվել, եւ 460 մլն դրամի լրացուցիչ շահաբաժին էր գոյացել, որը պետք է վերականգնվի բյուջե: 40 մլն դրամն արդեն վերականգնված է»,- ԱԺ-ում ասել է ՊՎԾ ղեկավար Ռոմանոս Պետրոսյանը:
Խոսելով պետական գնումների գործընթացի մասին, նա նշել է, որ երբ հստակ նշված չեն լինում գնվող ապրանքի տեխնիկական պարամետրերը, դա մեծ սողանցք է թողնում անբերախիղճ մատակարարների համար, որոնք գնային մեծ սեգմենտի մեջ գերշահույթ ստանալով մատակարարում են նվազագույն որակ ունեցող սարքեր կամ պիտույքներ:
Ռոմանոս Պետրոսյանը դա խնդրահարույց է համարել մեկ անձից գնումներւ, բայց չի համաձայնել, որ իշխանության գրեթե բոլոր գնումները մեկ անձից են կատարվում. «Եռամսյակային կտրվածքով պետական կառավարման համակարգում իրականացվում է շուրջ 2800-3000 հանրային գնում: Մեկ անձից գնումները այդ ծավալի մեջ չնչին տոկոս են կազմում: Մենք իրավասու ենք վերահսկելու հանրային գնումների ոլորտն ամբողջությամբ, եւ մեկ անձից գնումների մասով վերհանված խնդիր եթե ունենում ենք, մենք բնականաբար, առաջարկներ ենք ներկայացնում տվյլ մարմիններում՝ լավարկելու գնման գործընթացը»,-ասել է նա:
Անդրադառնալով «ատկատների» պրակտիկայի մասին հարցին նկատել է, որ երեւույթն ինքնին քրեաիրավական գնահատականի ենթակա է: « Եթե կան նմանատիպ երեւույթներ, ձեր խոսքով, նոր մեթոդներով, որոնք կիրառվում են պետական գնումներում, ես կխնդրեմ կամ մեզ փաստեր ներկայացնել, կամ իրավապահ մարմիններին հաղորդում ներկայացնել»: