Հաստատվեց դեղերի, բժշկաարտադրատեսակների գովազդի կարգը
Կառավարությունը սահմանել է դեղերի, բժշկական արտադրատեսակների և բուժական մեթոդների գովազդի թույլտվության տրամադրման կարգը, անհրաժեշտ փաստաթղթերի ցանկը, այդ գովազդին ներկայացվող պահանջները և դեղի գովազդային նյութի փորձաքննության կարգը:
Հիմնավորման մեջ նշվում է, որ «Դեղերի մասին» ՀՀ օրենքի 28-րդ հոդվածի համաձայն գովազդի թույլտվության տրամադրման համար պահանջվում է նաև գովազդային նյութի փորձաքննություն և ՀՀ կառավարության կողմից փորձաքննության կարգի սահմանում, ուստի որոշմամբ հաստատվում է երկու հավելված` դեղերի, բժշկական արտադրատեսակների և բուժական մեթոդների գովազդի թույլտվության տրամադրման կարգը, անհրաժեշտ փաստաթղթերի ցանկը և գովազդին ներկայացվող պահանջները և դեղի գովազդային նյութի փորձաքննության կարգը:
Առաջարկվող ընթացակարգի համաձայն, դեղի գովազդային նյութը նախապես ենթարկվում է փորձաքննության և համապատասխան եզրակացությունը ներկայացվում գովազդի թույլտվություն ստանալու նպատակով: Փորձաքննության ժամանակ գնահատվում է գովազդային նյութի համապատասխանությունը «Դեղերի մասին» Հայաստանի Հանրապետության օրենքի 28-րդ հոդվածով սահմանված պահանջներին:
Հարկ է նշել, որ նոր կարգավորումների համաձայն դեղերի, բժշկական արտադրատեսակների և բուժական մեթոդների գովազդի թույլտվություն տրամադրելու, իսկ դեղերի դեպքում նաև թույլտվության տրամադրման նպատակով իրականացվող փորձաքննության համար գանձվում է պետական տուրք, ուստի նախագծում սահմանվել են համապատասխան դրույթներ:
Հաշվի առնելով ընթացիկ թվայնացման գործընթացները՝ առաջարկվում է նաև անցում կատարել դիմումատուների հետ ամբողջովին էլեկտրոնային հաղորդակցմանը: