Ավստրալիայում մեկնարկել է Չափագրողների Միջազգային Ֆեդերացիայի աշխատանքային շաբաթը

Կադաստրի կոմիտեի ղեկավար Սուրեն Թովմասյանի գլխավորած պատվիրակությունը Ավստրալիայի Համագործակցության Բրիզբեն քաղաքում մասնակցում է Չափագրողների Միջազգային Ֆեդերացիայի (FIG) աշխատանքային շաբաթին:

Կադաստրի կոմիտեն Չափագրողների միջազգային ֆեդերացիայի փոխկապակցված (Affiliate Member) անդամ է դարձել 2023 թվականին:

Չափագրողների Միջազգային Ֆեդերացիայի (FIG) աշխատանքային շաբաթն ունի հագեցած օրակարգ, որին ակտիվ ներգրավվածություն ունեն Կադաստրի կոմիտեի պատվիրակության անդամները:

Կադաստրի կոմիտեի ղեկավար Սուրեն Թովմասյանը հանդիպում է ունեցել Չափագրողների Միջազգային Ֆեդերացիայի (FIG) նախագահ դոկտոր Դայան Դյումաշիեի հետ, ինչպես նաև Կադաստրի և հողերի կառավարման հարցերով 7-րդ հանձնաժողովի նախագահի հետ:

Կադաստրի կոմիտեի մասնագետները ակտիվ ներգրավված են Չափագրողների Միջազգային Ֆեդերացիայի Տարածական տեղեկատվության կառավարման, Կադաստրի և հողերի կառավարման և Անշարժ գույքի գնահատման և կառավարման հարցերով հանձնաժողովների աշխատանքներին:

Ֆեդերացիան միավորում է ավելի քան 120 երկրների ներկայացուցիչների և խթանում է չափագրողների միջև մասնագիտական ոլորտներում համագործակցության ընդլայնումը՝ նպատակ ունենալով նպաստել հանրության մշտապես փոփոխվող կարիքների բավարարմանը և կայուն զարգացման ապահովմանը: