Ռուսաստանում 2024 թվականին մոտ 3 հազար լրատվամիջոց է փակվել
Ռուսաստանում գործող լրատվամիջոցների թիվը շարունակում է նվազել։ Անցած տարվա արդյունքներով փակվել է 2970 լրատվամիջոց, որից կեսից ավելին՝ տպագիր։ Այս մասին «Ինտերֆաքս» լրատվական գործակալության գլխավոր տնօրենի տեղակալ Յուրի Պոգորելին խոսել է «Կոմերսանտ» հրատարակչության կողմից կազմակերպված համաժողովում, գրում է «Կոմերսանտը»:
«Լրատվամիջոցների ներդրման ֆիզիկական ենթակառուցվածքը շարունակում է նեղանալ: Տպագրությունը ահավոր ծանր վիճակում է թե՛ տարածման, թե՛ ֆիզիկական արտադրության առումով»,- նշել է Պոգորելին։
Նա հավելել է, որ նոր տպագիր մամուլի մեծ մասը ներկայացված է գիտական և թեմատիկ ամսագրերով, ինչպես նաև ժամանցային հրատարակություններով։ Նոր գրանցված առցանց լրատվամիջոցների թվում են պետական կառույցների կայքերը, որոնք երկար ժամանակ գործում են, սակայն այժմ ստացել են պաշտոնական լրատվամիջոցի կարգավիճակ։