«CryptoScope. Հայացք ֆինանսների ապագային» լրագրողական մրցույթ
Աշխարհի ամենամեծ կրիպտոարժույթային բորսայի առաջատար բլոկչեյն էկոհամակարգը Binance-ը՝ Web3 Armenia-ի, Տնտեսական լրագրողների ակումբի և Հայաստանի հանրային լրագրության ակումբի աջակցությամբ, հայտարարում է «CryptoScope. Հայացք ֆինանսների ապագային» լրագրողական մրցույթի մեկնարկի մասին։
Մրցույթի նպատակն է բարելավել կրիպտոարժույթներին, բլոկչեյնին և Web3 տեխնոլոգիաներին վերաբերող թեմաների լուսաբանման որակը և մակարդակը, ինչպես նաև նպաստել լայն լսարանի շրջանում կրիպտո գրագիտության ամրապնդմանը: Այս նախաձեռնությունը լրագրողներին և հեղինակներին հնարավորություն է տալիս նպաստել Հայաստանում թվային տնտեսության և նորարարությունների վերաբերյալ օբյեկտիվ, փորձագիտական և մատչելի քննարկման ձևավորմանը:
Մրցույթին հրավիրվում են մասնակցելու տեղական և միջազգային լրատվամիջոցների լրագրողական նյութերի հեղինակները, ինչպես նաև անկախ լրագրողները: Մրցույթը լայն հնարավորություններ է ընձեռում ընտրելու նյութի ժանրը, ոճը և մոտեցումը: Գնահատման հիմնական չափանիշներն են լինելու ինքնատիպությունը, ստեղծագործականությունը, վերլուծական խորությունը և ներկայացված փաստերի հավաստիությունը։
Մրցույթի ժյուրիում ընգրկված են Binance-ի Կենտրոնական և Արևելյան Եվրոպայի, Կենտրոնական Ասիայի և Աֆրիկայի տարածաշրջանային տնօրեն Կիրիլ Խոմյակովը, Web3 Հայաստան շահույթ չհետապնդող հիմնադրամի համահիմնադիր Արտյոմ Հարությունյանը, PR մասնագետ, դասախոս, Web3 Հայաստան հիմնադրամի PR մասնագետ Ռոզա Գրիգորյանը, Տնտեսական լրագրողների ակումբի ծրագրերի համակարգող Արամ Գարեգինյանը, Հանրային լրագրության ակումբի նախագահ և համահիմնադիր Սեդա Մուրադյանը։
«Մենք համոզված ենք, որ որակյալ լրագրությունը կարևոր դեր է խաղում կրիպտոարժույթների և բլոկչեյն տեխնոլոգիաների վերաբերյալ հասուն ընկալման ձևավորման գործում: Մասնագիտական հեղինակների աշխատանքի շնորհիվ հասարակությունը հասանելիություն է ստանում հուսալի, հավասարակշռված և ճիշտ տեղեկատվությանը: Նման գործունեությունը, անշուշտ, նպաստում է երկրի ողջ ոլորտի զարգացմանը: Տեղական լրագրողներին աջակցելը և նրանց մասնագիտական աճի հնարավորությունների ստեղծումը մեր կրթական առաքելության անբաժանելի մասն է կազմում: Մենք ուրախ ենք նպաստել Հայաստանի լրագրողական համայնքի զարգացմանը և վստահ ենք, որ մրցույթը կդառնա փորձի փոխանակման, երկխոսության և ոգեշնչման հարթակ», - նշել է Binance-ի Կենտրոնական և Արևելյան Եվրոպայի, Կենտրոնական Ասիայի և Աֆրիկայի ղեկավար Կիրիլ Խոմյակովը:
Մրցույթին մասնակցելու համար պետք է հրապարակել մրցույթի թեմային և պահանջներին համապատասխանող նյութեր և գրանցվել հղումով։
Մրցույթը կտևի երեք ամիս։ Արդյունքների հիման վրա կորոշվեն հաղթողները, որոնց համար նախատեսված են դրամական մրցանակներ։ Ընդհանուր մրցանակային ֆոնդը կազմում է 1500 դոլարին համարժեք ՀՀ դրամ։