Հավաքագրված հարկային մուտքերը 2025թ. հինգ ամսում ավելացել են 142 մլրդ դրամով. ՊԵԿ
Այս տարվա առաջին հինգ ամիսներին հավաքագրված հարկային մուտքերը նախորդ տարվա նույն ժամանակահատվածի համեմատ աճել են 14.4 տոկոսով։ Այս մասին հունիսի 9-ին «ՀՀ 2024թ. պետական բյուջեի կատարման մասին» հաշվետվության քննարկման ժամանակ խորհրդարանական մշտական հանձնաժողովների համատեղ նիստում հայտնել է Պետական եկամուտների կոմիտեի նախագահ Էդուարդ Հակոբյանը։
Գերատեսչության ղեկավարի խոսքով՝ իրենց հաջողվել է այս ոլորտում բավական տպավորիչ տեմպեր գրանցել։ «2025թ. հունվար-մայիս ամիսներին գրանցվել է մոտավորապես 142 մլրդ դրամի աճ, ինչը ենթադրում է 14.4 տոկոս աճ նախորդ տարվա նույն ժամանակահատվածի համեմատ»,- նշել է Հակոբյանը՝ շնորհակալություն հայտնելով բոլոր հարկ վճարողներին։
Վերոնշյալը, ինչպես նշել է Պետական եկամուտների կոմիտեի նախագահը, իրականում վկայում են տնտեսական աճի տեմպերի գերազանցման մասին։ «Սա, իր հերթին, նշանակում է, որ հարկեր-ՀՆԱ հարաբերակցության տեսանկյունից բարելավումն արդեն սկսվել է»,- նշել է պաշտոնյան։