ԵԱԶԲ խորհրդի փոխնախագահ Տիգրան Սարգսյանն անդրադարձավ Հայաստանից ստացված դիմումներին
«Էլեկտրոնային աշխատանքի բորսան աշխատանք փնտրելու և թափուր աշխատատեղերը լրացնելու առցանց հարթակ է։ Այն մշակվել է Եվրասիական տնտեսական միության երկրներում պետական առցանց զբաղվածության հարթակների ներդրման լավագույն փորձի հիման վրա և մասամբ ներդրվել է մեր բանկի ֆինանսական աջակցությամբ»,-ասաց Եվրասիական զարգացման բանկի կառավարման խորհրդի փոխնախագահ և ԵԱԶԲ թվային նախաձեռնությունների հիմնադրամի համակարգող Տիգրան Սարգսյանն՝ Մոսկվա-Մինսկ- Աստանա-Բիշքեկ-Երևան տեսակոնֆերանսի ժամանակ։
Տեսակոնֆերանսի թեման է «ԵԱՏՄ երկրների թվային նախագծերը՝ զբաղվածություն, կրթություն, երկրաբանություն և բժշկություն»։
«Այս հարթակի շնորհիվ պայմաններ են ստեղծվել ԵԱՏՄ-ում միասնական աշխատաշուկայի միաժամանակյա ձևավորման համար։ Հարթակը նաև թույլ է տալիս կուտակել և վերլուծել զբաղվածության տվյալները՝ այս ոլորտում պետական քաղաքականությունը բարելավելու համար»,-նշեց Սարգսյանը և հավելեց.
«Մինչ օրս ՀՀ մոտ 1 միլիոն քաղաքացի ծանոթացել է աշխատանքի որոնման և թափուր աշխատատեղերի լրացման նոր գործիքներին։ 2025 թվականի փետրվարի դրությամբ հարթակից օգտվել է ավելի քան 4000 աշխատանք փնտրող և ավելի քան 1000 գործատու, և լրացվել է ավելի քան 500 թափուր աշխատատեղ»։
«Այս հավելվածի պահանջարկը փաստում է, որ մենք ներկայումս բանակցություններ ենք վարում ՀՀ գործակալության հետ՝ այս հարթակը արդիականացնելու և նոր ծառայություններ ներդնելու շարունակական ֆինանսավորման համար, որոնք, ՀՀ պետական մարմինների կարծիքով, այսօր պահանջարկ ունեն», - ասաց Տ. Սարգսյանը։
Նրա խոսքով՝ անցյալ շաբաթ հանդիպում է տեղի ունեցել ՀՀ տեղեկատվական համակարգերի գործակալության տնօրեն Ներսես Երիցյանի հետ։
«Մենք քննարկել ենք ոչ միայն այս նախագիծը և ֆինանսավորման հայտը, այլև այլ նախագծեր, որոնք այսօր պահանջարկ ունեն... Այժմ մենք մշակում ենք վիճակագրության և առողջապահության ոլորտների երկու հայտ,որոնց համաձայն նախատեսվում է թվայնացնել ՀՀ բնակչության մարդահամարի արդյունքները և ՀՀ Ազգային վիճակագրական ծառայության համար ներդնել թվային վերլուծության գործիքներ։ Երկրորդ նախագիծը նպատակ ունի Հայաստանի էլեկտրոնային առողջապահության համակարգի համար ստեղծել և ներդնել մայրության և վերարտադրողական առողջության թվային արձանագրություն»,- բացատրեց Սարգսյանը՝ հավելելով.
«Մենք Հայաստանից նաև ստացել ենք «Կորիզ» կրթական հարթակի հայտը։ Սա դպրոցականների համար նախատեսված բջջային հավելված է, որն ուսուցման համար առաջարկում է վիկտորինաներ և մրցույթներ։ Մենք տեսանք, որ այս հարթակը շատ տարածված է Հայաստանում և կցանկանայինք ընդլայնել այս լուծումը»։