Թրամփը հայտարարել է, որ էներգակիրների գներն իջեցնելու համար կօգտագործի ռազմավարական նավթային պահուստը

Նախագահ Դոնալդ Թրամփը հայտարարել է ԱՄՆ ռազմավարական նավթային պահուստը (SPR) օգտագործելու մտադրության մասին՝ Իրանի հետ պատերազմի պայմաններում էներգիայի ծախսերը իջեցնելու նպատակով։

«Մենք դա կանենք, այնուհետև կրկին կլրացնենք այն»,- ասել է Թրամփը WKRC հեռուստաալիքին տված հարցազրույցում։

«Ես այն մեկ անգամ լրացրել եմ, և կրկին կլրացնեմ, բայց հիմա մենք փոքր-ինչ կնվազեցնենք պահուստը, և դա կհանգեցնի գների իջեցման»,- հավելել է նախագահը։

Նրա մեկնաբանությունները հաջորդել են Իրանի հետ պատերազմի պատճառով առաջացած զանգվածային մատակարարման խափանումները փոխհատուցելու համար 400 միլիոն բարել նավթ վաճառահանելու Միջազգային էներգետիկ գործակալության (IEA) որոշմանը։ Դա IEA-ի ավելի քան 50-ամյա պատմության մեջ պաշարների խոշորագույն վաճառահանումն է։

CNBC-ի տվյալներով՝ Միացյալ Նահանգները IEA-ի անդամ է Եվրոպայի, Հյուսիսային Ամերիկայի և Հյուսիսարևելյան Ասիայի ավելի քան 30 երկրների հետ միասին։

Ներկայում ԱՄՆ ռազմավարական նավթի պահուստը պարունակում է 415 միլիոն բարել նավթ, որը կազմում է 714 միլիոն բարելի թույլատրված հզորության մոտավորապես 58%-ը: Ներքին գործերի նախարար Դուգ Բուրգումը ավելի վաղ CNBC-ին հայտնել էր, որ IEA-ի գործողություններին ԱՄՆ մասնակցության  կամ չմասնակցության վերաբերյալ վերջնական որոշումը կընդունի Թրամփը: