Հայաստանի ֆոնդային բորսան ամփոփել է մարտի տվյալները
Հայաստանի ֆոնդային բորսան ամփոփել է 2026 թվականի մարտի գործունեության արդյունքները, որոնք փաստում են շուկայական ակտիվության և ներդրողների վստահության շարունակական աճը։ Բոլոր հիմնական հարթակներում գրանցվել է առևտրի ծավալների էական ավելացում նախորդ տարվա նույն ժամանակահատվածի համեմատ։
Պետական պարտատոմսերի առաջնային հարթակում տեղաբաշխվել է ավելի քան 29.5 մլրդ դրամի պարտատոմս։ Երկրորդային շուկայում իրականացված 166 գործարքների ընդհանուր ծավալը գերազանցել է 76.4 մլրդ դրամը, ինչը 95%-ով ավելի է նախորդ տարվա մարտի ցուցանիշից։
Կորպորատիվ պարտատոմսերի շուկայում առևտրի ծավալն աճել է 99%-ով՝ կազմելով շուրջ 15.4 մլրդ դրամ։ Ամսվա ընթացքում կնքվել է 1830 գործարք՝ շրջանառվող 197 կորպորատիվ պարտատոմսերով։ Բաժնետոմսերի շուկայում արձանագրվել է առավել տպավորիչ աճ. առևտրի ծավալը կազմել է շուրջ 2 մլրդ դրամ, ինչը 786%-ով գերազանցում է նախորդ տարվա ցուցանիշը։ Շուկայի կապիտալիզացիան հասել է մոտ 458.85 մլրդ դրամի։
Ռեպո գործարքների ծավալը մարտին կազմել է ավելի քան 14 մլրդ դրամ՝ նախորդ տարվա համեմատ աճելով 146%-ով։ Արտարժույթի շուկայում իրականացվել է ԱՄՆ դոլարի փոխանակման 13 գործարք՝ 2.6 մլրդ դրամ ընդհանուր ծավալով, որտեղ փոխարժեքը տատանվել է 377.75-ից 378.5 դրամի միջակայքում։