Նոր Սահմանադրության նախագիծը կհրապարակվի մինչև տարեվերջ. Փաշինյան
Հայաստանի նոր Սահմանադրության նախագիծը կհրապարակվի մինչև տարեվերջ։ Այսօր կառավարության նիստից հետո լրագրողների հետ զրույցում այս մասին ասաց ՀՀ վարչապետ Նիկոլ Փաշինյանը։
Նա հիշեցրեց, որ Սահմանադրության փոփոխության հարցը ներառված է իրենց` «Քաղաքացիական պայմանագիր» կուսակցության նախընտրական ծրագրում։
«Ժողովուրդը քվեարկել է, 726 հազար մարդ քվեարկել է դրա օգտին, այլ բան, որ խորհրդարանում ուժերի հարաբերակցությունը թույլ չի տալիս Սահմանադրությունում փոփոխություններ կատարել բացառապես ներխորհրդարանական մեխանիզմների օգնությամբ (իշխող ուժը ստացել է մանդատների 2/3-ից պակաս մասը. խմբ.)»,– ասաց նա։
Դիտարկմանը, որ նոր Սահմանադրությունը պետք է հրապարակվեր մարտին, սակայն մինչ օրս տեքստը չկա, Փաշինյանն արձագանքեց` այն գրեթե պատրաստ է։
««Քաղաքացիական պայմանագիր» կուսակցության վարչության անդամները տեքստի վերաբերյալ առաջարկություններ են ներկայացրել, սակայն կուսակցությունում որոշել են դրանք չքննարկել նախընտրական շտապողականության մեջ։ Որոշվել էր այդ քննարկումները հետաձգել հետընտրական շրջան»,– ասաց Փաշինյանը։