Հայաստանի տնտեսական ակտիվությունը հունիսին աճել է 7.7%-ով, առաջին կիսամյակում՝ 7.9%-ով

Hայաստանի տնտեսական ակտիվության ցուցանիշը 2026 թվականի հունիսին նախորդ տարվա նույն ամսվա համեմատ աճել է 7.7%-ով։ Նախորդ ամսվա՝ մայիսի համեմատ աճը կազմել է 4.4%։ Ընդհանուր առմամբ, 2026 թվականի հունվար-հունիսին տնտեսական ակտիվությունն աճել է 7.9%-ով՝ նախորդ տարվա նույն ժամանակահատվածի համեմատ։ Տվյալները ներկայացված են ՀՀ վիճակագրական կոմիտեի՝ հուլիսի 27-ի դրությամբ հրապարակված օպերատիվ ամփոփման մեջ։

Առաջին կիսամյակի տնտեսական աճի հիմնական հենասյուները շարունակում են լինել շինարարությունը, ծառայությունները և արդյունաբերությունը։ Արտաքին առևտրի կառուցվածքում նկատվում է անհամաչափություն․ ներմուծումն աճում է, իսկ արտահանումը շարունակում է նվազել։

Շինարարության ոլորտում աճը շարունակում է մնալ ամենաբարձրերից մեկը։ Հունիսին շինարարության ծավալը կազմել է 74.9 մլրդ դրամ՝ նախորդ տարվա հունիսի համեմատ աճելով 25.4%-ով։ Մայիսի համեմատ աճը կազմել է 19.5%։ Առաջին կիսամյակում շինարարության ծավալը հասել է 282.2 մլրդ դրամի, ինչը 24.5%-ով գերազանցում է 2025 թվականի նույն ժամանակահատվածի ցուցանիշը։

Ծառայությունների ոլորտը ևս պահպանել է բարձր աճի տեմպը։ Առանց առևտրի ծառայությունների ծավալը հունիսին կազմել է 415 մլրդ դրամ՝ տարեկան կտրվածքով աճելով 19.7%-ով։ Առաջին կիսամյակի արդյունքով ծառայությունների ծավալը կազմել է 2.15 տրլն դրամ, իսկ աճը՝ 11%։

Արդյունաբերության աճը համեմատաբար ավելի չափավոր է։ Հունիսին արդյունաբերական արտադրանքի ծավալը կազմել է 256.7 մլրդ դրամ, ինչը նախորդ տարվա հունիսի համեմատ ավելի է 4%-ով, սակայն մայիսի համեմատ ցուցանիշը նվազել է 3.1%-ով։ Առաջին կիսամյակում արդյունաբերության ծավալը կազմել է 1.52 տրլն դրամ՝ տարեկան 10.8% աճով։

Առևտրի ոլորտում պատկերն ավելի թույլ է։ Հունիսին առևտրի շրջանառությունը կազմել է 585.9 մլրդ դրամ՝ գրեթե նույն մակարդակը, ինչ նախորդ տարվա հունիսին․ տարեկան ցուցանիշը կազմել է 99.9%։ Միևնույն ժամանակ, մայիսի համեմատ առևտրի շրջանառությունն աճել է 6.3%-ով։ Առաջին կիսամյակում առևտրի շրջանառությունը կազմել է 3.16 տրլն դրամ, տարեկան աճը՝ ընդամենը 0.9%։

Գյուղատնտեսության մասով ամսական տվյալներ չեն ներկայացվում, սակայն առաջին կիսամյակի ցուցանիշը բացասական է․ գյուղատնտեսության համախառն արտադրանքի ծավալը կազմել է 310.1 մլրդ դրամ, ինչը նախորդ տարվա նույն ժամանակահատվածի համեմատ ցածր է 11.9%-ով։